МАИЯ В СЕДЬМЫЙ ДЕНЬ
СЛУЖБА ПРЕПОДОБНОМУ ОТЦУ НАШЕМУ
НИЛУ, СОРСКОМУ ЧУДОТВОРЦУ

Весело днесь сошедшеся в памяти твоей, Ниле богомудре, отче наш, воспети потщимся твоя подвиги, пощения и бдения, и поучение писаний, имиже напоил еси твою душу, блаженне, и израстил еси добродетелей многоплодныя класы.

Твоих исправлений высоту и глубину смирения безмерную кто сказати доволен, преподобне отче Ниле приснопамятне; Просиял бо еси, яко светило, в российстей земли, осиявая монашествующих соборы добродетелей твоих светлостию.

Безмолвия воистинну был еси любитель, отче приснопамятне, и пустыни гражданин преизряден, и яко древо, насажденное при водах, еже плод дает во время свое, точиши бо исцеления с верою призывающым имя твое и чтущым от любве всеосвященныя твоя подвиги.

Яко скрижали богописанныя, оставил еси чадом твоим, отче, твоих словес списания, яже на горе богомыслия в сердце твоем перстом Божиим написашася, темже тя почитаем и святое твое совершаем торжество, славяще тя прославльшаго Иисуса Человеколюбца и Спаса душ наших.

Преподобне отче наш Ниле, воистину сна твоима очима не дал еси, ниже плоти твоей упокоения, дондеже уготовал еси в себе место Господеви и селение Богу Иаковлю, тем и во дворы Его, радуяся, вшел еси, идеже всех веселящихся жилище, но, отче приснопамятне, о нас моляся не престай, твою память всесвященнейшую верою и любовию благочестно совершающих.

Владычице благая, христиан всех славословие немолчное, приими, Богородительнице, хваления раб твоих, любовию Тя величающих.

Ниле богомудре, твоя рабы приими торжествующыя любовию, отче, всесвященную память твою.

Стих: Честна пред Господем смерть преподобных Его.

Верно ныне сошедшеся в памяти твоей, отче, ублажаем тя любовию, величающе тебе Прославльшаго.

Стих: Праведник, яко финикс, процветет, и яко кедр, иже в Ливане, умножится.

Приими ныне пение твоих чад, преподобне, радостно торжествующих в честней твоей памяти, Ниле богомудре, отче наш.

Приими, Владычице, моление твоих раб и Сына Твоего умоли, с Нилом богомудрым, подати нам грехов прощение.

Все отложив мiрское пристрастие, преподобне, и крест твой на рамо взем, чистым и немятежным умом Христу последовал еси: в пустыни, яко в раи, живый, Тому угодил еси, яко безплотен, на земли жительствуя, постом и молитвою, и всенощными стоянии страсти умертвил еси, молчанием же и богомыслием Богу соединился еси, Егоже моли о душах наших.

Тихое и безмятежное житие пожив, в месте безмолвнем уединяяся, непрестанною молитвою Богу беседовал еси и поучением Божественных писаний, яко дождем благодати, ниву твоего сердца богатно напоил еси, богомудре, тем и Святаго Духа вместилище показался еси и плод сторичествующ принесл еси, преподобне отче наш Ниле приснопамятне, молися убо выну ко Господу о душах наших.

Неуклонно шествуя, преподобне, путем христовых заповедей, отеческих богомудрых преданий опасный хранитель был еси, Ниле богомудре, отче наш приснопамятне, к сим и законоположник и основатель в российстей земли скитскаго жительства показался еси, и яко скрижали завета, твоя богомудрая словеса и предания твоему житию последовати желающым оставил еси, отче. Тем молим тя, преподобне, Христу прилежно молися о душах наших.

Любовию ко Христу уязвлен быв, преподобне, Того страсти спасительныя непрестанно во уме обносил еси и сих подражатель изряден показался еси, постными подвиги плоть распиная со страстьми и похотьми, острою же власяницею и иным жестокожитием плоти неудобопокорливое души разумному покорил еси.Тем молим тя, боголюбезне отче наш Ниле приснопамятне, Христу прилежно молися о душах наших.

Скитскаго жительства наставника тя почитаем, отче наш Ниле, твоею бо стезею воистинну право ходити в безмолвии пустыни познахом: правый бо путь сего жительства словесы и делы показуя, яко образ одушевлен, самаго себе нам представил еси. И блажен еси истинно, яко, сотворив, научил еси, тем и велий в Царствии Небеснем, по глаголу Господню, нареклся еси. Тому бо трудолюбно поработав и вражию всю силу, козни и ловительства, яко паучину, разтерзав, победоносец во всех показался еси и ко Христу венценосец востекл еси, радуяся. Егоже моли, преподобне, о всех, верою совершающих твою память всесвященнейшую, еже дароватися нам грехов прощению и велией милости.

Радуйся, пустыня жаждущая, да веселится пустыня и цветет яко крин. И процветет, и вовеселится пустыня Иорданова, и слава Ливанова дадеся ей, и честь Кармилова, и узрят людие мои славу Господню и высоту Божию. Укрепитеся, руце ослабленыя и колена разслабленая, утешитеся, малодушнии умом, укрепитеся, не бойтеся: се Бог наш суд воздает и воздаст, Той приидет и спасет нас. Тогда отверзутся очи слепых и уши глухих услышат. Тогда скочит хромый яко елень и ясен будет язык гугнивых, яко проторжеся вода в пустыни и дебрь в земли жаждущей. И безводная будет во езера и на жаждущей земли источник водный будет: тамо будет веселие птицам и селитва трости, и лузи. И тамо будет путь чист, и путь свят наречется, и не приидет тамо нечистый, ниже будет тамо путь нечист: разсеяннии же пойдут по нему и не заблудят. И не будет тамо льва, ни от зверей злых не взыдет нань, ниже обрящется тамо, но пойдут по нему избавленнии: и собрании Господем обратятся и приидут в Сион с радостию, и радость вечная над главою их, над главою бо их хвала и веселие, и радость приимет я, отбеже болезнь, печаль и воздыхание.

Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои исходи живота, и уготовляется хотение от Господа. Сего ради молю вас и предлагаю мой глас сыновом человеческим, яко аз, премудрость, устроих совет и разум, и смысл аз призвах. Мой совет и утверждение, мой разум, моя же крепость. Аз мене любящыя люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих: ничтоже в них стропотно, ниже развращенно. Вся права суть разумевающым и проста обретающым разум. Научаю бо вас истине, да будет о Господе надежда ваша, и исполнитеся Духа.

Уста праведнаго каплют премудрость, язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие, уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости: правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути: в нечестие же падает неправда. Правда мужей правых избавит их: безсовестием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устнех нечестивых сеть гражданом, чувство же праведных благопоспешное. Во благих праведных исправится град, и в погибели нечестивых радование. Во благословении правых возвысится град, усты же нечестивых раскопается. Ругается гражданом лишенный разума, муж же мудрый безмолвие водит.

Во благознаменитый день праздника нашего вострубим духовною трубою, духовно радующеся и светло торжествующе, всесвятую и всечестную память отца нашего и любезно воззовем ему, глаголюще: радуйся, пастырю и учителю наш и светило монашествующих пресветлейшее, отче наш Ниле приснопамятне. Христу, Емуже усердно поработал еси, отче, о нас прилежно молися, верою и любовию чтущих тя.

Священными днесь песньми священнейшую память отца нашего, яко цветы, увенчаем, похвальныя венцы плетуще, и любовию прославляюще того священнейшыя подвиги, и в веселии вопиюще ему: радуйся, цвете монашествующих краснейший, во удолиих пустынных прозябший и добрых детелей совокупленьми страну белоезерскую украсивый. Радуйся, древо благоплодное, при исходищах вод псаломски насажденное и плодами исправлений и богомудрых писаний твоих множества иночествующих питающее, радуйся, постнических мир алавастр многоценный, Христову Церковь облагоухавший. Но, о преблаженне и приснопамятне Ниле, отче Ниле, не престай о нас моляся ко Господу, да избавит нас от всякаго вреда и спасет душы нашя.

Приидите, празднолюбных соборы, приидите, возвеселитеся с нами, и лик составльше, торжествуим: се бо наста всепразднственная и светоносная память богоноснаго отца и светлаго мiру светильника, нам же превожделеннейшаго пастыря и учителя, и ко спасению наставника, и о всех теплаго предстателя, молитбося выну ко Господу дароватися всем велией милости.

Еже по образу Христову соблюл еси невредно, ум владыку на страсти пагубныя постнически поставив, и на высоту добродетелей, яже по подобию Спасову, яко мощно, возшел еси, мужески бо естество понудив, потщался еси хуждшее покорити лучшему и плоть поработити духу. Тем и монашествующым наставник явился еси, житель пустынный, воистинну благотекущих обучитель и добродетелей известнейшее правило, и ныне на Небесех зерцалом разрешшимся, отче наш Ниле приснопамятне, чисте зриши Святую Троицу, моляся присно о всех, верою и любовию чтущих тя.

Ангельския премiрныя силы твоему житию удивишася, преподобне, во плоти бо сый, безплотныя враги победил еси, и постом и молитвами воскриляемь, вне мiра и плоти богомысленно летая, края желаний достигл еси, радостно Христу взывая: благословен, пришедый спасти нас, Спасе наш, слава Тебе.

Стих: Се удалихся бегая, и водворихся в пустыни.

Бегая мiра, удалился еси в пустыню псаломски, и тамо водворився, Бога, спасающаго тя, обрел еси, преподобне, и обрет, в себе удержал еси: пришед бо, Христос со Отцем и Духом Святым обитель в тебе сотвори. Темже и мы, память твою торжествующе, радостно взываем: благословен еси, иже во святых прославляемый, Спасе наш, слава Тебе.

Стих: Аз к Богу воззвах, и Господь услыша мя.

Непрестанно молитвою и ума трезвостию Богу взывал еси, преподобне, и Той услыша тя воистинну. Тем и яко безплотен на земли пожив, воздержанием страсти умертвил еси и глубоким смиренномудрием твоим смирил еси, яко язвлена, гордаго диавола, победительно Христу взывая: благословен, снизшедый и спасый нас, Спасе наш, слава Тебе.

Радостно днесь стекшеся, братие, и духовный лик составльше, торжествуим светло, и божественными песньми летнюю память почтим богоноснаго отца, пастыря и учителя нашего, яко цветы, увенчаем похвалами того священную главу, и всечестную его раку окруживше, возопием, глаголюще: радуйся, Ниле благоглаголивый, веселящий словес твоих теченьми соборы иночествующих. Радуйся, светильниче монашествующих светозарный. Радуйся, постническая красото и утверждение. Прииди и ныне к нам невидимо и благослови чада твоя, сподобляя ны твоих невещественных даров, ихже богатно от Христа приял еси, верно от любве тебе чтущыя и прерадостно совершающыя твой всечестный и светоносный праздник. Избави нас от страстей мучительства и всяких скорбей и обстояний и обитель твою соблюди невредиму и всем вся полезная даруй ко Господу твоими молитвами.

Удалився бегая, Давидски мiра, и вся, яже в нем, яко уметы вменив, и в месте безмолвне вселився, духовныя радости исполнился еси, отче наш Ниле, и Единому Богу изволив служити, процвел еси, яко финикс, яко лоза благоплодна, умножил еси чада пустыни. Тем благодарственно вопием: слава Укрепльшему тя в подвиге пустынножительства, слава Избравшему тя в России отшельником уставоположника изрядна. Слава молитвами твоими и нас Спасающему.

Мiрскаго жития отвергся и мятежа житейскаго бегая, преподобне и богоносне отче наш Ниле, не обленился еси собрати цветы райския от писаний отеческих, и в пустыню вселився, процвел еси, яко крин сельный, отнюдуже прешел еси и в небесныя обители. Научи и нас, честно почитающих тя, твоим царским путем шествовати и молися о душах наших.

Усердно днесь стекшеся, братие, духовный лик составим в честней памяти отца нашего, песни и благохваления тому плетуще, благоговейно почтим духовныя его подвиги, победы и борения, имиже победи многокозненнаго враги и яко победоносец венчася светло от Христа Бога и Спаса душ наших.

Хвалу принесем, вернии, Матери Бога нашего, и рабски любовию вземшеся, воззовем согласно, ангельски вопиюще к Ней: радуйся, Благодатная Дево, рождшая спасение душ наших.

Светлое торжество совершающе днесь, братие, воспоим Христа Избавителя нашего, хвалу Тому приносяще и взывающе: возвеличил еси, Христе, твоего угодника, показал нам того чудес источник, источает бо от святаго своего гроба исцелений струи верно притекающым и любовию чтущым того и Тебе, Спасе, славящым, славящыя Тя прославляющаго.

Ходатайства приими преподобнаго отца нашего Нила и молитву сотвори, Чистая, за нас к Богу.

Удивил еси, Владыко Христе, показав нам во отце нашем таковаго светильника: той бо, яко солнце, лучы чудес испущая, осиявает верных собрания и просвещает соборы монашествующих светлостию жительства. Тем тому любезно воззовем: богоносе и всеблаженне отче наш Ниле, моли Христа Бога грехов оставление даровати празднующым любовию всечестную память твою.

Удивишася, Чистая, вси ангелов чини и человеческая множества таинству Твоего рождения страному: како бо неискусомужная Млекопитательница еси и держиши на руку Твоею Питающаго всю тварь и Содержащаго. Темже вопием Ти: Богородице Приснодево, моли Сына Твоего грехов оставление даровати верою покланяющымся пресвятому рождеству Твоему.

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою радуяся Тоя чудеса.

Греховною тьмою покрываемь, не могу ясно зрети к высоте исправлений твоих, отче, но ты, яко сострадален и милостив, помози ми, возсиявая спасительный в души моей свет, да пою, радуяся, светлая твоя исправления и преславная чудеса.

Мысленный рай показался еси, отче, произращая различных добродетелей цветы, плоды красны своему Владыце принесл еси, украсившему тя чудесы.

Едину преступив заповедь, первозданный из рая изгнан бысть. Ты же, преподобне, заповедей владычних соблюдением наследник сего показался еси, древа животнаго наслаждаяся присно, и в веселии чистаго сердца твоего зря Господа, Божественнаго света Его причащаешися.

Неуклонно шествуя по стопам заповедей, жезл силы, крест Христов в руках держя, в пристанище безстрастия достигл еси, отче. Тем и благодать приял еси целити недуги человеков и преславная творити чудеса.

Ныне время помощи Твоея, Владычице, призри милостивно на озлобление твоего раба, Чистая, подающи утешение мне, яко да и аз воспою, радуяся, Божественная Твоя чудеса.

Ирмос: Твоя песнословцы, Богородице, живый и независтный источниче, лик себе совокупльшыя, духовно утверди, в Божественней Твоей славы венцев славы сподоби.

Не гордяся, дерзнух песнь приносити твоей священной памяти, отче, но любовию твоею движим, боголюбезне, приими убо сию от твоего раба и ко Господу ходатайствы твоими спасения сподоби мя.

Любовию тя чтущыя, отче, спасай от бед и обстояний, в честней твоей памяти лик себе совокупльшыя, и колеблемыя ны страстей бурею утверди твоими мольбами и во пристанище спасения достигнути сподоби.

Кто изречет твоя подвиги, отче, и смирения твоего высоту кто скажет; воистину Христов ученик был еси, о боголюбезне, и снаследник Того Царствия. Поминай убо чад твоих, отче, моляся Христу, да и нас части спасаемых сподобит.

Неключим аз есмь и всячески непотребен и недоумею по достоянию воспети твоя, яже к Богу, исправления, но, отче благосерде, любовь и веру приими и твоими священными ходатайствы спасения мя сподоби.

Недоумеет воистинну всяк язык человеческий достойно славословити Тя, о Владычице, по достоянию. Аз же, невежествием и грехи многими одержимь, что имам принести Тебе, Благая; обаче любовь и веру твоего раба приими и спасения сподоби мя.

Терпя, потерпел еси суетныя обычаи и мiрския нравы братий твоих, обрел еси пустынное безмолвие, преподобне отче, идеже постом, бдением и непрестанною молитвою в трудех подвизався, ученьми твоими правыя стези указал еси нам шествовати ко Господу. Темже и почитаем тя, всеблаженне Ниле.

От деяния на высоту Божественнаго востекл еси, отче, видения, и молчание конечное облобызав, безмятежным умом Богу присно беседовал еси, сего ради разумении Божественными оттуду обогатился еси, блаженне, и был еси пастырь и наставник последующым равноангельному житию твоему. Тем, богоносе отче наш Ниле, моли Христа Бога грехов оставление даровати празднующым любовию святую память твою.

В пучину люте впад уныния от множества грехопадений моих, Чистая, приидох в недоумение и отчаянием ныне обдержуся. Владычице Богородице, Ты мя спаси, Ты ми помози, грешным бо Ты еси очищение, яко да и аз, со всеми, получившими Тобою спасение, веселяся, воспою непостижное таинство рождества Твоего и безмерную Твою милость.

Ирмос: Седяй в славе на престоле Божества во облаце легце прииде Иисус Пребожественный нетленно дланию спасе зовущыя: слава Христе силе Твоей.

Низвергл еси вся вражия, отче, ополчения, стоя бодренно на стражи внимания и издалеча предзря сих коварныя сети, молитвою же и постом безбедно прелетая, победительно пел еси: слава Христе силе Твоей.

Всегда во уме имея страдания Спаса нашего и вольное на Кресте распятие, сраспялся еси Тому умерщвлением плоти, преподобне, и Того Божественною любовию уязвил твое сердце, боголюбезне, показался еси умиления источник, слезоточя присно и поя: слава, Христе, благоутробному снизхождению Твоему.

Христовою уязвлен любовию, слезныя токи непрестанно из очес изливал еси, Ниле, отче наш приснопамятне, и в пустыни, яко в раи, водворяяся, непрестанныя приносил еси молитвы, поя присно: слава, Христе, силе Твоей.

Увы, коликим нечувствием содержимь есмь, окаянный аз: ни смерти боюся, ни страшнаго судища трепещу, всякому злу повинен сый. Но, о душе всестрастная, поне отныне воспряни в покаянии, Христу зовущи: твоего ради угодника Нила, пощади мя, Спасе, и исправи стопы моя, Владыко, всемогущею силою Твоею.

Богородице Дево, христиан всех всенадежное упование, спаси мя, отчаяннаго, о Мати милосердая, оживи душею умершаго, жизнь всех рождшая. Живоносный источниче, напой мя умиления водами, зноем страстей люте опаляемаго, да покаяния слезами прохлаждаемь, благодарно воззову: слава, Владычице, всемощней силе Твоей.

Ирмос: Ужасошася всяческая о Божественней славе Твоей: Ты бо неискусобрачная Дево, имела еси во утробе над всеми Бога, и родила еси безлетнаго Сына, всем воспевающым Тя мiр подавающая.

Отцев древних святыя горы житию подражая, богоносне отче наш Ниле приснопамятне, во отишие пустынаго безмолвия потекл еси радуяся, и тамо во смирении плоды принося духа, по премногу благоугодил еси славою чудес тя Обогатившему.

Господни заповеди исполняя, кроток и незлобив, отче, был еси, смирен и прост, и во всех добродетелех благоискусен, тем и Святаго Духа орган явился еси, премудре, научая и вразумляя чада твоя достойно ходити во след Христу, во смирении Тому служащым спасение подающаго.

Ныне, преподобне, приемля на небесех почести трудов твоих, не забуди нас, твой праздник радостно празднующих, но испроси грехов разрешение, молящи Христа, прославльших Его славящым, спасение подающаго.

Облеклся еси во Христа, богомудре, безстрастия одеждою украсився, сострадателен и милостив, отче, был еси согрешающым, смиренномудро поучая и возбуждая к покаянию и ко Христу приводя, всем, во смирении просящым, спасение подающему.

Одеждою студа облекохся окаянный аз, совлечен боготканныя, юже во крещении приях, одежды, о Дево всенепорочная! Но молю Тя, Всемилостивая, во одежду мя спасения паки облеки, да достоин буду брака Агнча, Емуже от чистых кровей Твоих багряницу плоти исткала еси, всем воспевающым Тя спасение подающему.

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

С лики святых в небесных ныне водворяяся селениих, о Ниле богоносе, и со дерзновением предстоя Пресвятей Троице, нас, твоих чад, не забуди, отче, но испроси грехов разрешение твой праздник радостно празднующым, да благодарно тя прославльшаго Бога славим.

Новый благотечный в Российстей земли источник явился еси, богоносе, струи исцелений изливая от святаго твоего гроба верою несумненною притекающым к тебе, Ниле, отче наш, мы же веселия исполняеми, тя прославляющаго Бога славим.

Усердно от юности твоея даже до честнаго преставления совестию чистою Христу послужил еси, преподобне, Того храня Божественныя заповеди, нестяжанием бо и нищетою себе оградив, на камени терпения твоя стопы, мудры, утвердил еси, Ниле отче наш.

Многая твоя, о, отче, исправления и яже в Бозе труды и подвиги твоя, пощение и бдение, долу легания и злострадания, нищету и совершенное нестяжание кто изрещи возможет; воистинну бо истинен монах показался еси, боголюбезне, тем и мы, любезно твою память чтуще, тя укрепльшаго Бога славим.

Утроба Твоя, о Дево Пренепорочная, пространнейшая небес показася, вместившая невместимаго Бога. О, преславных вещей! О, непостижимаго ангелом и человеком, на Тебе совершившагося таинства! Тем Тя, Богородицу, воистинну исповедающе, от Тебе рождшагося Бога славим.

Любве ради Христовы удалився мiрских смущений, радостною душею вселился еси в пустыни, в нейже подвизався добре, яко ангел на земли, отче Ниле, пожил еси: бдением бо и постом тело свое изнурил еси вечныя ради жизни. Еяже ныне сподобився, во свете неизреченыя радости Пресвятей Троице со святыми предстоя, моли, молимтися, припадающе, чада твоя, сохранитися нам от всякаго навета и злых обстояний видимых и невидимых враг и спастися душам нашым.

Ангельскому поревновав житию и великим во отцех подобяся, всего себе отрешил еси мiрскаго сплетения, к подвигам же постничества мужески вооружився, опасно путем Божиих заповедей шествовал еси, блаженне. Темже и мы, верно чтущии твою священную память, похвалами ублажаем тя сими:
Радуйся, ангельскаго жития подражателю:
Радуйся, древних великих отец житию приемниче.
Радуйся, невидимых врагов мужественный победителю:
Радуйся, заповедей Божиих хранителю усердный.
Радуйся, отеческих Богодухновеных преданий опасный ревнителю:
Радуйся, монашескаго постническаго жительства законоположителю.
Радуйся, добродетелей чистейшее зерцало:
Радуйся, Духа Святаго сладкогласный орган.
Радуйся, образе глубокаго смирения:
Радуйся, ревностный исполнителю Божественных детелей.
Радуйся, яко тобою научихомся непрелестным путем жития ходити:
Радуйся, яко твоим за ны ходатайством спасение получити надеемся.
Радуйся, Ниле чудотворче, отче наш.

Ирмос: Не послужиша твари богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси.

Песнь препросту усердно приношу ти, отче: приими убо сию от недостойнаго и не возгнушайся мене, паче всех грешнейшаго, о преблаженне, но, милостивно преклонься, спасение улучити твоим предстательством сподоби, да, радуяся, пою: препетый отцев Господь и Боже, благословен еси.

Един с Единым Богом непрестанно беседовал еси, отче, чистыя молитвы чистым и немятежным умом Тому принося и совестию чистою, о богомудре, от деяния бо к видению востек, весь боговиден содеялся еси, блаженне, присно поя: препетый отцев Господь и Боже, благословен еси.

Плодоносен сад показался еси, отче, приносящ плоды духа, любве бо и радости преисполнен был еси, мира, долготерпения, кротости и воздержания, и яко Христов воистинну, плоть распиная со страстьми и похотьми, и присно поя: препетый отцев Господь и Боже, благословен еси.

Не мудростию, но любовию тебе поющаго приими, о отче, и светосиянною твоею молитвою забвения и неведения тьму разгнав, помози ми вопити присно: препетый отцев Господь и Боже, благословен еси.

Под кров Твой, Владычице, прибегающаго не отрини, но, яко Всемилостивая, спаси убогаго раба твоего, от безмерных согрешений моих избавляющи мя, да, радуяся, пою: препетаго отцев Господа и Бога Мати, во веки благословена еси.

Ирмос: Отроки благочестивыя в пещи рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Отче наш Ниле приснопамятне, красно и добро воистину житие препроводил еси, о боголюбезне: мiрския бо молвы избежав и в пустыню уединився, скорби постныя сеял еси со слезами, но ныне, радуяся, жнеши присноживотия класы.

Единому тайная ведущему Богу втайне поработал еси, отче, во смирении проходя добродетелей поприще, о блаженне, по преставлении же твоем явлен и светел еси чудесы, пети воздвизая верныя: Господа пойте, дела, и превозносите Его во вся веки.

Божественною благодатию, сущею в тебе, источаеши исцеления и прогоняеши духи лукавствия от приходящих к тебе верно, Ниле всеблаженне. Тем и мы любезно чтим твою священную память, весело поюще: Господа пойте, дела, и превозносите Его во вся веки.

Услыши, Владычице, болезненное воздыхание твоего раба, разрешивши вериги моих согрешений, печаль на радость преложи и болезни премени вскоре, да радуяся, пою Тя, Дево, и превозношу, Чистая, во вся веки.

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресветел светильник отечеству твоему явился еси, преподобне, осиявая светлостию твоею жительства наша и чудес сияньми, имиже по преставлении твоем прославился еси, о блаженне. Тем, твою светоносную память чтуще, Христа славим, светло тя прославляющаго.

Егда краснии твои нозе, добре по спасения пути текшыя, на одре смертном простерл еси, блаженне, тогда ученицы твои, слезы точаще, глаголаху: камо отходиши, пастырю наш, и кому оставляеши чада твоя, отче, ихже духовне породив, воспитал еси млеком твоего мудраго наставления?

Плачем моея радости не растворяйте, о чада, ты рекл еси им, о богоблаженне, аз бо, веселяся, отхожду прияти венец правды, егоже обеща Христос Того любящым, идеже и вы потщитеся постигнути, соблюдше Того, вкупе и моя заповеди.

Да восплачет вкупе с нами пустыня сия, о отче, аще бо и процвете, яко крин, красующися богоугодным жительством твоим, но имея по тебе добраго делателя, терние и волчец имать возрастити. Обаче не остави посещати стадо твое, отче, и сам ты упаси тебе величающыя.

Не забуди и ныне нас, обитающих на месте твоего трудоположнаго жительства, о Ниле богоносе, отче наш, и песнь усердно тебе приносящым ходатайствуй спасение: тя бо, о всеблаженне, молитвенника и предстателя ко Господу стяжавше, надежды не отщетимся, верно тя чтущии.

Одеждою спасения одей мя, о всенадежное спасения моего упование, Мати Божия, на Тебе надеюся, Всемилостивая: сокровищница бо еси милости и вся спасаеши, к Тебе прибегающыя. Спаси убо и мене, отчаяннаго, да благодарно пою: радуйся, Всеблаженная Богородице, Чистая Приснодево.

Подвиги твоими, о богоблаженне, удивил еси ангелы и человеки, Бога же возвеселил еси, тем тя чтим верно, твою торжествующе память, Ниле богоносе, отче наш.

Величия Твоя, о Дево и Богородице чистая, превосходят всякое человеков разумение, обаче дерзаем, бреннии, любезно Тебе вопити: радуйся, ангелом и человеком превожделенная радосте.

О, преславнаго чудесе! В последних родех просия светило монашествующих, Нил, премудрый отец наш, златоструйныя бо реки учений излия и одушевлен образ себе самаго показа истинно монашествовати желающым, егоже молитвами, Христе, спаси душы нашя, яко Един Благоутробен.

О, преславнаго чудесе! Божественныя благодати исполнен, явися Нил, блаженнейший отец наш: ум бо к Богу вперив, весь световиден показася, телом же в пустыни живый, духом на небесех обиташе. Егоже молитвами, Христе, спаси душы нашя, яко Един Благоутробен.

О, преславнаго чудесе! Источник чудесем показася Нил, преподобный отец наш, ибо и по смерти источает исцеления верно притекающым к нему. Егоже молитвами, Христе, страсти душ и телес наших исцели и спаси нас, яко Един Благоутробен.

Преподобне отче наш Ниле, воистинну ты, бегая мiра и водворяяся в пустыни, яко агнец незлобив, в ней упаслся еси на злаце божественных писаний и, яко пчела трудолюбна и премудра, духовныя цветы облетая, паче меда сладчайшыя собрал еси словеса, имиже питаеши чада твоя, отче. Темже, днесь сошедшеся, ублажаем тя любовию, торжествующе священную твою память и молящеся тобою получити грехов оставление и велию милость душам нашым.

Духовный лик днесь совокупльше, божественне возвеселимся в священнейший памяти отца нашего: се бо предлагает нам трапезу таинственную и питие сладчайшее, своих постнических подвигов высокая исправления, всякий разум удивляющыя и душевныя наша чувства услаждающыя, имиже духовне насыщаеми, хвалу усты недостойными тому принести потщимся. Сей бо, лоза Христова винограда быв истинно, страхом суда и болезньми постническими точило сердца своего изгнетая, слезныя токи, яко вино, воистину сердце веселящее, непрестанно точаше. Тому днесь, духовне веселящеся, хвалу принесем, псаломски воспевающе и глаголюще: честна пред Господем твоя смерть бысть, преподобне, и прерадостна нам твоя память, боголюбезне, в нейже ныне духовне учреждаеми, молебно тебе вопием: молися, богоносе отче наш Ниле, ко Спасу всех, даровати нам единомыслие, мир и велию милость.

Владычице, приими молитвы раб твоих и избави нас от всякия нужды и печали.

О, преподобне и богоблаженне отче Ниле, богомудрый наставниче и учителю наш! Ты, любве ради Божия удаляяся мiрских смущений, в непроходней пустыни и в дебрех изволил еси вселитися, и яко лоза благоплодна, умножив чада пустыни, явил еси себе им словом, писанием и житием образ всякия иноческия добродетели, и яко ангел во плоти, пожив на земли, ныне в селениих небесных, идеже празднующих глас непрестанный, водворяешися, и с лики святых Богу предстоя, Тому хвалы и славословия непрестанно приносиши. Молим тя, богоблаженне, настави и нас, жительствующих под кровом твоим, непреткновенно ходити по стопам твоим: любити Господа Бога всем сердцем своим, Того Единаго вожделети и о Том едином помышляти, мужественно же и благоискусно пратися с долу влекущими нас помыслы и прилоги вражиими и тех всегда побеждати. Возлюбити всякую тесноту монашескаго жития, и возненавидети красная мiра сего любве ради Христовы и насадити в сердцах своих всякую добродетель, в нейже сам потрудился еси. Моли Христа Бога, да и всем православным христианом, в мiре живущим, просветит ум и очи сердечная, еже ко спасению утвердит их в вере, и благочестии, и в делании заповедей своих, сохранит от лести мiра сего и дарует им и нам оставление грехов и к сим приложит, по неложному обетованию Своему, и вся потребная нам ко временному животу, да в пустыни и в мiре жительствующе, тихое и безмолвное житие поживем во всяком благочестии и честности, и Того усты и сердцем прославим купно со безначальным Его Отцем и Пресвятым и Благим и Животворящим Его Духом всегда, ныне, и присно, и во веки веков. Аминь.

Текст службы преподобному Нилу Сорскому любезно предоставлен администратором сайта "Акафисты" (acathist.narod.ru).