Божiею благодатiю, и Пресвятыа Богородица помощiю переписахъ житiа святыхъ преподобныхъ отецъ. Писахъ же съ разъныхъ списъковъ, тщася обрести правая, и обретохъ в съпискехъ онехъ многа неисправлена. И елика възможьна моемоу хоудомоу разоуму, сiа исправляхъ, а яже невъзможна, сiа оставляхъ, да имоущiи разоумъ болше насъ, ти исправять неисправленаа, и недостаточная наполнять, азъ же что написахъ. И аще каа обрящоутся въ техъ несъгласна разумоу истинны, и азъ о сихъ прощенiа прошоу. А хто имать сiа преписовати, или прочитати, да не преписоуеть тако ни прочитаеть, но истинное да пишеть и глаголеть, еже есть оугодно Богоу и полезно души. Понеже i азъ грешныи тако хощоу, и не токмо еже зде написахъ, но и инде что писахъ и глаголахъ. I аще что обрящется въ техъ не оугодно Богоу и неполезно души, ради моего неразоумiа и невежьства. И о сихъ молю, да не творитъ кто тако, но лоучшее да творить, еже есть благооугодно Богоу и полезно души, и азъ о семъ радоуюся. И тако благодатiю Божiею прилагаю сiа, отемля виноу ищущимъ вину на вредъ души. Прочитающихъ же сiа, и слышащихъ чтомыхъ, молю, да Господа ради помолятся о мне, да и азъ помилованъ боуду от Бога, понеже немало потроудихся въ сихъ, яко же мню заповеди ради любве Божiа и ближняго. Да сихъ дивныхъ отецъ житiамъ внимающе, ревнители боудем деланiю ихъ, да с ними и Животъ Вечныи наследимъ. Азъ бо аще и грешенъ и нерадивъ есмь и ничтоже благо сътворихъ, но желаю много искренимъ спасение. Се же есть истинная любовь къ ближнимъ, еже въздвигноути имъ совесть къ любви Божиiи, и творити заповеди Его по истинныхъ Божественныхъ Писанiи, и по житiю святыхъ отецъ, и тако спасти...