Писание твое, отче, еже писал еси ко мне, просивши от мене отписати ми к тебе, еже на пользу, и известити ми тебе о себе. Что мниши скорбь мне на тебе тех ради речей, что беседовали есмы с тобою, когда еси был зде, и о том прости мя. Советовал есмь, воспоминая тебе о себе, яко присному своему любимому, якоже писано есть: таинства моя моим сыновом дому моего открываю. Что не просто, или яко прилучися, подобает нам творити и дела некая, но по Божественных писаниих и по преданию святых Отец, преже исшествия из монастыря, точию же польз ради душевных, а не за ино что. Занеже не видя ныне хранима жительства закон Божиих, по святых писаниих и преданию святых Отец, но по своих волях и умышлениих человеческих, и во мнозех обретается се, что и самое то развращенное творити, и сие мним (1) добродетель проходити. Се же случается от еже неведети нам святаго писания, понеже не тщимся, со страхом Божиим и со смирением, испытовати сия, небрежем о сих, в человеческая упражняемся. Аз же того ради тако беседовах тебе, понеже истинно, а не притворено хощеши слово Божие слышати и творити.

И аз, не лаская тя, ни сокрывая жестоту (2) теснаго пути и прискорбнаго, предложих ти: иным же противу меры когождо беседую. Ты же веси мою худость изначала, яко присный духовне любимиче мой. Сего ради и ныне пишу тебе, явлено о себе творя, понеже по Бозе любовь твоя понуждает мя, и безумна мя творит, еже послати ми к тебе о себе. Егда в монастыре купно жили есмы, сам веси, яко соплетений мирских удаляюся, и творю елико по силе, по Божественных писаниих, аще и не возмогаю тако, ради лености моея и небрежения. Таже, по отшествии странничества моего, пришед в монастырь, вне близь монастыря сотворих себе келлию и такожде живях, елико по силе моей. Ныне же вдали от монастыря преселихся, понеже, благодатию Божиею, обретох место угодно моему разуму, занеже мирской чади (3) маловходно, якоже сам видел еси, и наипаче - испытую Божественная писания, прежде заповеди Господни с толкованием, и апостольская предания; таже - жития, учения святых Отец, и тем внимаю, яже согласна моему разуму, ко благоугождению Божию и к пользе души преписую себе, и теми поучаюся, и в том живот и дыхание мое имею. А немощь мою, и леность и нерадение на Бога и на Пречистую Богородицу возложих; и аще что лучится творити ми, аще не обрящу то во святых Писаниях, отлагаю се на время, дондеже обрящу; понеже бо, по своей воле и по своему разуму, не смею что творити. И аще кто любовию духовною прилепляется мне, тако же советую делати, - наипаче же, тебе, занеже изначала духовною любовию усвояем еси ко мне. Сего ради и слово подвигох к тебе, советую во благо, яко своей души, како тщуся сам делати, тако и тебе беседовах. Ныне, аще и разне телом есмы, но духовною любовию сопряжени и совокупни, и устава ради сея Божественныя любве, беседовах ти тогда, и ныне пишу, призывая воскресение души. И ты, яже слыша от мене и сия писания видев, аще ти угодно есть, подражания сын и наследник (старайся) быти святых Отец.

Твори заповеди Господня и предания святых Отец, и сущим с тобою братиям глаголи. Аще особне вселение твое есть, или в монастыре со братиями еси внимай святых писанием и по стопам святых Отец шествуй, занеже Божественная писания нам тако повелевают; или повинутися такому человеку, кто будет свидетельствован в делании словом и разумом духовне, якова же пишет Великий Василий в слове, емуже начало: приидипе ко мне вcu тружающиися. Аще ли не обрящется таков; ино повинутися Богу по Божественных писаниих, а не тако безсловесно, яко же нецыи, егда в монастыре с братиями, и, мнящеся в повиновении, самовольны безсловесно пасутся и отшельствие такожде творят неразумно, волею плотскою ведущеся и разумом неразсудным, не ведяще - ни еже творят, ни о нихже утвержаютсл. О таковых Иоанн Лествичник разсуждая, в оньже о различии безмолвия слове, глаголет: "самомнением паче, нежели наставлением от мнения, плавати изволиша". Да не будет нам! Ты же, творя по святых писаниих и по жительству святых, благодатию Христовою не погрешиши. Ныне же и аз оскорбихся о том, что ты скорбен; того ради понудихся писати к тебе, чтобы не скорбен был. Бог же всякия радости и утехи да утешит сердце твое, и известит о нашей любви еже к тебе, аще и грубо написах ти что, но не иному кому, но тебе, присному и возлюбленному моему, не хотя презрети прошение твое: надеюбося, яко с любовию приимеши, и не позазриши неразумию моему. А о вещех наших и о нихже молих святыню твою, та добре потщался еси устроити, о том челом бию. Бог да подаст ти мзду противо твоему труду! Ктому же еще молю твою святыню, да не положиши словеса она в скорбь, яже глаголахом тогда. Аще бо по внешнему мнятся жестока, внутрь же - исполнь пользы: понеже не своя глаголах, и от святых писаний. Жестоко убо по истинне онем, иже не хотят истинно смиритися во страсе Божием, и плотских мудрований отступити, но во своих волях страстных жити, а не по святых писаний. Таковии убо не испытуют святая писания со смирением духовне. Нецыи же от них не хотят и слышати ныне, яко же бы рещи - не нам написана суть, и не подлежит еже в нынешнем роде хранити та. Истинным же делателем, и древним и ныне и до века, словеса Господня чиста, яко сребро разжено и очищено седмерицею, и заповеди Его светлы и вожделенны паче злата и камения честна, и услаждают их паче меда и coma, и хранят я, и внегда сохранят я, восприимут воздаяния многа. Здравствуй о Господе, господине отче, и моли о нас грешных, а мы святыне твоей вельми челом бием.


ПРИМЕЧАНИЯ СОСТАВИТЕЛЯ ИЗДАНИЯ 1869 г.

(1) Сие место не очень ясно, но имеет такой смысл: "многие худо живут, а думают, что провождают житие добродетельно".

(2) Жестоку, т. е. трудность.

(3) Т. е. мирским людям.