Еже усты ко устам беседова твоя святыня ко мне, честнейший отче, таже и писания о том же присылал ми еси: требуеши от моея худости, написано послати тебе слово полезно, и еже ко благоугождению Божию и к пользе души. И аз убо человек грешен и неразумен есмь, и всеми страстьми побеждаем, боюся начати такову вещь: того ради отрицахся есмь и отлагахся. Но понеже духовная твоя любовь устрои мя, еже дерзнути ми, выше меры моея, написати тебе подоблющая, того ради убедихся на се.

Вопрошение твое первое (1).

О помыслах блудных, како сопротивитися им? И о сем не тебе точию тщание и подвиг, но и всем, подвизающимся с Богом, понеже велия сия борьба, глаголют отцы, сугубу рать имея - в души и теле: не имать нужнейши сего естество. Того ради крепце тщатися подобает, и трезвенно и бодро соблюдати свое сердце от сих помысл, и страх Божий имея пред очима, поминати обещание наше, еже исповедахом - пребывати в целомудрии и чистоте. Целомудрие же и чистота, не внешнее точию житие, но и сокровенный сердца человек, егда чистотствует (2) от скверных помысл, тем же всячески пощательно отсецати сии помыслы. Сию же победу велию на них поставити, еже молитися Богу прилежно, яко же предаша святии отцы, различными образы единем же разумом. Ов убо рече, отдавна приим, сице молитися: изгоняющии мя ныне обыдоша мя: радосте моя, избави мя от обышедших мя. Ин же от тех же глаголет сице: Боже, в помощь мою вонми, и сим подобная. Ин же паки от тех: суди, Господи, обидящия мя и возбрани борящия мя и прочее псалма. Призывай же на помощь их же слышиши в писаниих - подвизавшихся о целомудрии и чистоте. Егда же зельне належит ти брань, aбие вocтaв, и на небо очи и руце простер, молися сице: "Ты силен еси, Господи, и Твой есть подвиг: Ты ратуй и победи в том, Господи о нас", - и возопий ко Всесильному в немощех, смиренными вещанми: помилуй мя, Господи, яко немощен есмь. Сие убо предание святих есть.

И аще в сих борениих проходя будеши, и познаеши искусом, яко, благодатию Божиею, сия сими зелне побеждaются, всегда же Иисусова имени оружиим-ратники: крепчайши бо сея победы несть. Сохраняй же ся от видения лиц и слышания бесед таковых, иже воздвижут страсти и поставляют нечистые помыслы, и Бог соблюдет тя, и сия убо о сих.


Второе же вопрошение твое о хульном помысле (3).

И сей помысл безстуден и лют ecть; зелo cтужaeт же крепце и непостоятельне; и не точию ныне, но и древле бысть, великим Отцем и святым мучеником, и в самое то время, егда хотяху мучители предати телеса их на раны и смерти горькия, исповедания ради веры - еже в Господа нашего Иисуса Христа. И на сий помысл победу имети сице: еже не душу свою, но нечистаго беса виновна быти сему, глаголати же противу хульному духу сия: "отъиди от мене, сатано; Господу Богу моему покланяюcя, u Тому единому послужу; тебе же - хула твоя, на верх твой возвратится тебе; напишет и сию Господь; отступи убо от мене. Бог, создавый мя по образу Своему и по подобию, да упразднит тя". Аще ли и по сих стужает безстудствуя, преложи помысл на ину некую вещь, Божественну или человеческу, аще что и не вне подобающих. Сохраняй же ся от гордыни и в путех смирения тщися проходити; речено бо есть отцы: яко от гордыни рождаются хульные помыслы; бывают же и от зависти бесовския; и аще от сего или онаго бывают, но якоже аннии? губительная и ядовитым зверем, тако и сей страсти губительно есть смирение, не точию же сей, но и прочим, речено бысть святыми отцы.


Третий вопрос:

А еже испытуеши, како отступити от мира, и сие добро усердие твое. Потщися делом сему совершитися сице в тебе. Сие бо есть позлащенный путь к вечному животу, имже, во внятии премудрости познавше, идоша преподобнии отцы; или паки бо подобно тому отступление мира, емуже во обычай бысть совокупление с миром: аще бо не отступят, якоже образы нецыи и начертание мира, прежде бывшая в нем от слышания и видения мирских вещей, паки поновляются, и не может трезвенно пребывати в молитве, и Божиим волям поучатися. Хотяй же поучатися благоугождению Божию должен есть отступити мира; не восхощи же приятия обычных другов беседы, иже мирская мудрствующих и упражняющихся в безсловесная попечения, яже в прибытки монастырскаго богатства и стяжании имений; яже мнятся сия творити во образ благодати и от неразумия Божественных писаний, или от своих пристрастий добродетель проходити. И ты человече Божий, таковым не приобщайся, не подобает же и на таковых речми наскакати, ни поношати, ни укорити, но Богови оставляти сия; силен бо есть Бог исправити их. Сохраняй себе повсячески от дерзновения; дерзновение бо, якоже писано есть, подобно огню великому, иже, егда бывает, вси бежат от лица его. И отвращайся слышати и видети вещи братняя и тайнества их (4) и деяния: ся бо сотворяет душу пусту всякаго блага и устрояет смотряти недостатки ближняго, и оставляет - еже плакати своя грехи. И не тщися скоро глаголив быти в беседах ко братии, аще и полезна мнится быти. Но аще который брат извещение имать к нам, и истинно требует слова Божия, и аще имамы, - и должны есмы подати ему, не точию слово Божие, по апостолю свидетельству, но и свою душу. Сообращайся с таковыми и соблаговоли тем в деланиих, иже духовне мудрствуют, яже суть чада таин Божиих. С нетаковыми же беседы, аще и малы суть, изсушают цветы добродетелей, иже внове процветающи от растворения безмолвия и окружащая с мягкостию и с младостию сад души, всажденный при исходищих вод покаяния, якоже рече мудрый святый.

А еже ищеши: како не заблудити от истиннаго пути, и о сем совет благ даю ти. Свяжи себе законы Божественных писаний, и последуй тем, писанием же истинным, Божественным. Писания бо многа, но не вся божественна суть. Ты же истинная известне испытав от чтения, сих (держися) и бесед разумных и духовных мужей, понеже не вси, но разумнии разумевают сих, и без свидетельства писаний таковых не твори что. Якоже и аз о себе поведаю ти, понеже по Бозе любовь твоя безумна мя сотворяет, еже о себе глаголати ми; но якоже речено есть: таинства моя любящим мя открываю, того ради глаголю ти. Аз убо не творю без свидетельства Божественных писаний, но во святых писаниих последуя; творю елико по силе. Егда бо творити ми что, испытую прежде Божественная писания, и аще не обращу согласующа моему разуму в начинание дела, отлагаю то, дондеже обрящу. Егда же обрящу благодатию Божиею, творю благодерзостно, яко известно. О себе же не смею творити, понеже невежда и поселянин есмь. Сице, аще и ты хощеши, сотворяй по святым Писаниим, и по сих разуму тщися делати заповеди Божия, и предания святых Отец. И аще волнения житейских вещей кая подвижут сердце твое, не ужасайся, утверждаем на недвижимом камени заповедей Гocnoднuх (5) и ограждаем преданиями Св. Отец. И о всем буди ревнитель тем, ихже слышиши и видиши от святых писаний, имущих свидетельствовано житие и мудрование: сих бо право есть шествование пути. И сия написуя в сердце своем, пойди неуклонно в путь Божий и не заблудиши, благодатию Божиею, от истины: писано бо есть, яко невозможно праве мудрствующу и благочестне живущу погибнути. Но елицы растленным разумом творят дело Божие, сии погрешают от праваго пути. Шествуй же невозвратно, положпв руку на рало Господне и не возря вспять (6), да управлен будеши в царство Божие. И потщися, прием семя слова Божия, не обрестися сердцу твоему путь (7), камень, ни терния, но -благая земля, сотворяя многосугубе плод во святыне души своея, да аз, разумно твое во услышании слова Божия разсмотрив, и яже достойная похвалам, исправлениих добродетелем в тебе обрет, возрадуюся, благодаря Бога, увидев в тебе слышавша слово Божие и храняща е. Молю же тя, Господа ради, молити за мя грешнаго, глаголюща доброе, а не творяща николиже никакоже. Бог же, творяй преславная и подавая всяко даяние благотворящим волю Его, да подаст ти разум и утвержение - творити волю Его святую, молитвами Пречистыя Владычицы нашея Богородицы и всех Святых, яко благословен есть во веки.

Аминь.


ПРИМЕЧАНИЯ СОСТАВИТЕЛЯ ИЗДАНИЯ 1869 г.

(1) Ответ на сие вопрошение, во многих мыслях буквально согласен с тем, что говорится в уставе против страсти блуда.

(2) Т. е. сохраняет себя в чистоте.

(3) Читатель увидит, что и этот вопрос разрешается сходно, даже по букве, с уставом.

(4) Т. е. секреты или тайны.

(5) Выражение взято из известной песни великопостнаго канона св. Андрея Критскаго.

(6) Не озираясь назад.

(7) Оборот речи, усвоенный из известной Евангельской притчи о Сеятеле.