Похвально желание подвигнул еси, о возлюбленне, еже - слышати слово Божие ищеши на утверждение себе, на сохранение от злых и поучение ко благим. Но надобно бы было тебе сия от добре разумеющих навыцати. Ты же требуеши сие от мене, неразумнаго грешника. Аз убо во учимых чину непотребен есмь. Того ради отрицахся и отлагах на мнозе, не яко нехотя послужения принести благому твоему произволению, но ради неразумия и грех моих. Что бо аз реку, не сотворив сам ничтоже благо? Кий разум есть грешнику, точию грехи? Но понеже множицею понудило мя еси на сие, еже писати ми тебе слово к созиданию добродетелей, и аз дерзнух написати к тебе сия, яже выше меры моея, не могий презрети прошение твое, да не множае оскорбишися. Вопрошение же твое о находящих помыслех предняго мирскаго жития. И сам от искуса разумееши, колики скорби и развращения имать мир сей мимоходящий, и колика злолютства сотворяет любящим его, и како посмевается отходу работавших ему, сладок являяйся, егда ласкает вещьми, горек бывая последи. Поелику убо мнят благая его множащася, егда удерживаются им, потолику растут скорби им; и мнящася бо его благая, по-видимому, суть блага, внутрь же исполнена многа зла; того ради имущим разум истиною благий, и явленне показует себе, да не возлюблен будет ими. По прешествии же жития сего, что бывает? Положи мысль тверду во глаголемое: чим пользова мир держащихся его? Аще кои славы, и чести и богатство имеша, не вся ли сия ни вочтоже быша?

И яко сень мимо идоша, и яко дым исчезоша? И мнози от сих, сообращающеся в вещех мира сего, и любяще пошествие его во время юности благоденства своего, смертию пожати быша, яко цветцы сельнии процветевше отпадоша, и нехотяще отведени быша отсюду. А егда пребываху в мире сем, не разумеша злосмрадия его, но тщахуся во украшении и покой телесный, и изобретающе разумы прикладные в прибытки мира сего и во учениих прохождаху, яже венчают тело в веце сем преходящем, и аще сия вся получиша, а о будущем и некончаемом блаженстве и не попекошася. Что непщевати о таковых, точию сих мир безумнейши не имать, яко же рече некий премудрый святый? Нецыи же от сих благоговейнейшии быша, яко обращаху ум свой в помышлениих желания спасения души, и имяху борения к страстем, и образом добродетелей по возможному творяху, хотяще разрешитися и отступити мира сего, но не могоша отторгнутися от сетей его. Тебе же возлюбив Бог и изъят от мира сего, и постави тя в чину службы Своея, милостию и строением Своим. Того ради должен еси попремногу благодарити милость Его, и творити вся, елико по силе, ко благоугождению Его, и ко спасению души своея, задняя забывая, яко непотребна, к предним же добродетелем простираяся, яко животу вечному ходатайствена; радуяся гряди на почесть вышняго звания, яже о небесном отечествии подвизающимся щадимая (1). А еже рекл ми еси о помыслех нечистых, иже от врага душ наших приносимых, о сих не зело поглощайся скорбию и не ужасайся. Понеже не точию нам, немощным и страстным, о сих стужение бывает, глаголют отцы, но и сущим в предуспеянии и в житии достохвальном пребывающим, и благодати духовней отчасти сподобившимся, и сим - ратование бывает много от таковых помысл, и подвизи велицы о сих обретаются, и благодатию Божиею едва отгоняют сих, тщащеся всегда на отсечение сих. И ты сим утешайся, но тщательно отсецай лукавые помыслы, имей же на сих всегдашнюю победумолитву: Господа Иисуса (2) призывай. Сим бо призыванием отгониши, бежаще отыдут, яко же рече Иоанн Лествичник: "Иисусовым именем бий ратники, крепчайши бо сего оружия несть". Аще ли же зельне укрепятся на тя ратующии тя: тогда, востав очи на небо и руце воздев, усердне рцы со умилением: помилуй мя, Господи, яко немощен есмь; Ты, Господи, силен еси, и Твой есть подвиг, Ты ратуй о нас и победи, Господи. И аще сице творя будеши неленостно, всяко искусом научишися, яко Вышняго силою сия побуждаются. Твори же что либо рукоделие: сим бо лукавые помыслы отгоняются и се есть предание ангельско никоему от великих святых. Изучай что от писания изусть, в том ум полагая: и сия возбраняют к нам вход нашествия бесовскаго, и то есть изобретение святых отец. Сохраняй же ся от бесед слышания и зрения неподобных, иже воздвижут страсти и укрепляют нечистые помыслы, и Бог поможет ти. О страховании, еже глаголеши, се есть младенчественный обычай немужественных душ; тебе же не свойственно есть сие.

И егда прилучаттися таковая, подвизайся, да не обладают тобою, и утверди сердце свое уповати на Бога, и рцы в себе сице: "имам Бога храняща мя, без воли Его не может никтоже ни в чем повредити мя. Аще ли что попустит на мя, еже пострадати ми, и аз се не злолютне приемлю, и не хощу упразднити хотение Его, понеже Господь множае мене веcть, и хочет пoлeзная мне, и аз о сих всех благодарю благость Его", и тако, благодатию Божиею, благодерзостен будеши. Молитвою же всегда на се вооружайся; и егда в киих местех сие прилучиттися, тамо наипаче тщися приходити, и руце крестообразно простер, Господа Иисуса призывай, и, помощию Вышняго, не убоишися от страха нощнаго и от стрелы, летящия во дни. И сия убо o cиx. Пpoчaя жe вся, елика похвальна, и честна и добродетельна, сия помышляй и твори; мудр бывай во благое; всяку же злобу ненавидя, имей пocлушaние к наставнику и прочим отцем о Господе, во всяко дело благо. Службе же, ейже ныне поручен еси, или во ину прейдеши, буди служа светлым предложением и тщанием благообразным, яко - самому Христу; всю братию святы имей. Аще прилучиттися слово, вопрос или ответ кому, благоглаголиво и сладко беседу твори с любовию духовною и со смирением истинным; неразленено и не преобидя брата, благоговейным oтцeм прилепляяcя, и то - во время и в меру. От не таковых же ошайся. Сохрани же ся и тщися не укорити, ни осудити ни кого в чем, аще и не благо что зрится, но себе грешна и неключима во всем вменяй. Аще ти потребна будет кая вещь от настоятеля или прочих воображенных (3) отец, на то, прежде помолився, размысли в себе, аще полезна есть, и тако попроси. Аще не устроиши якоже хощеши, не огорчайся, ни ожесточися просто - еже не по твоему хотению сотворишася, аще и благо мниттися; якоже ты хощеши; но с терпением прейди, и с тихостию и с пожданием все твори.

И аще ко благоугождению Божию и ко спасению души своея управляяся будеши, всяко известит Бог сотворити кому по потребе твоей, и время, и руку помощи подаст. Буди же усерден к послушанию (4) Божественных Писаний, и сих глаголы, яко водою животною, напаяя свою душу, тщися, елико по силе, по сих творити. Тако же имущим разум Божественных писаний, и мудрование духовно, и жительство свидетельствовано в добродетелех, - таковым тщися повиноватися, и тех житию подражатель быти, терпение имей в скорбех и за оскорбивших тя молися; имей тех, яко благодетелей. И се разумей, еже глаголю ти, разум Божественных писаний, поведающь хотение благодеяния Божия, яко от века святии, иже содеяша правду, получиша обетования (Евр. 11, 33), ходивше в путех добродетелей, не токмо беды и скорби претерпевше; но и крестом и смертию шествуема бе стезя их, и се есть знаменье любве Божия, еже скорби принесутся кому от делания правды, и сие глаголется дар Божий, Апостолу пишущу: се дано нам бысть от Бога, еже не токмо во Христа веровати, но и еже о Нем страдати. Сие бо сотворяет человека обещника (5) страстем Христовым и подобна святым, иже претерпеша скорби за имя Его, и не инако благодатствует Бог за имя Его любящих Его, точию посылает им искушения скорбей. И в сем разнствуют любимицы Божии от прочих, да сии убо во скорбех живут; любящие же мир - сии в пищи и покои веселятся. И се есть путь правый, еже претерпети искушения скорбей о благочестии, и на сей путь наставляя, Бог страдальцев Своих проводит в живот вечный. И сего ради с радостию подобает шествовати нам непорочне в путь сей, ходяще в заповедех Господних, всем сердцем благодаряще Его, яко посла нам благодать сию, возлюбив нас, безпрестанно молящеся благодати Его, поминающе конец жития сего скорбнаго, и безконечное блаженство будущаго века. И Бог всякия радости и утешения утешит сердце твое и сохранит тя в страсе своем, молитвами пречистыя Богородицы и всех святых. Не забвена, Господа ради, сотвори мене грешника в молитвах своих, глаголюща ти доброе, а не творяща, да Господь изведет мя от тимения грехов.


ПРИМЕЧАНИЯ СОСТАВИТЕЛЯ ИЗДАНИЯ 1869 г.

(1) Щадимая т.е. сберегаемая.

(2) Как оружие для победы злых помыслов, блаженный Нил советует иметь непрестанно в сердце известную молитву Иисусову.

(3) Т. е. назначенных.

(4) Т. е. к слушанию.

(5) Т. е. общника, участника.